રૂપાણી સળંગ ચાર વર્ષ પૂર્ણ કરનારા ગુજરાતના પાંચમાં મુખ્યમંત્રી

– મુખ્યમંત્રી તરીકે વિજય રૂપાણીના ચાર વર્ષ પૂર્ણ

– હિતેન્દ્ર દેસાઇ, માધવસિંહ, અમરસિંહ , નરેન્દ્ર મોદી જ સતત ચાર વર્ષ પૂર્ણ કરી શક્યા છે

વિજય રૂપાણી 7 ઓગસ્ટના ગુજરાતના મુખ્યમંત્રી તરીકે ચાર વર્ષ પૂરા કરશે. આ સાથે જ ગુજરાતના મુખ્યમંત્રી તરીકે સતત ચાર વર્ષ પૂરા કરનારા તેઓ પાંચમાં મુખ્યમંત્રી બની જશે.

1 મે 1960થી અત્યારસુધી ગુજરાત કુલ 16 મુખ્યમંત્રી જોઇ ચૂક્યું છે. આ 16માંથી ચાર જ મુખ્યમંત્રી એવા છે જેઓ પોતાના કાર્યકાળના સતત ચાર વર્ષ પૂરા કરી શક્યા છે.

જેમાં હિતેન્દ્ર દેસાઇ 3 એપ્રિલ 1967થી 12 મે 1971 (4 વર્ષ 1 મહિના 9 દિવસ), માધવસિંહ સોલંકી  7 જૂન 1980થી 10 માર્ચ 1985 ( 4 વર્ષ 9 મહિના 3 દિવસ), અમરસિંહ ચૌધરી 6 જુલાઇ 1985થી  9 ડિસેમ્બર 1989 (4 વર્ષ 5 મહિના 3 દિવસ), નરેન્દ્ર મોદી 22 ડિસેમ્બર 2002થી 22 મે 2014 (11 વર્ષ 5 મહિના) જ મુખ્યમંત્રીઓ છે જેમણે પોતાના કાર્યકાળના સતત ચાર વર્ષ પૂરા કર્યા છે.

આનંદીબહેન પટેલે 22 મે 2014થી 7 ઓગસ્ટ 2016 એમ કુલ 2 વર્ષ 77 દિવસ ગુજરાતનાં મુખ્યમંત્રી તરીકેનો કાર્યકાળ સંભાળ્યો હતો. તેમના સ્થાને 7 ઓગસ્ટથી 2016થી વિજય રૂપાણી મુખ્યમંત્રી તરીકેની જવાબદારી અદા કરી રહ્યા છે.