શરદ પૂનમની રાત્રિના ચંદ્રના કિરણથી શરીરની અનેક વ્યાધિઓ શમી જાય છે

શરદપૂર્ણિમાની રઢીયાળી રાત્રીના ચંદ્રના કિરણોનું ફકત ધાર્મિક દ્રષ્ટિએ જ નહિ બલકે આરોગ્યની દ્રષ્ટિએ પણ અત્યંત મહત્વ છે.તેથી જ શરદપુનમે ચંદ્રને ધરીને દૂધપૌઆ આરોગવાનુ મહત્વ છે. એટલુ જ નહિ દૂધપૌઆ સાથે ચોકકસ ઔષધીઓનું સેવન દમ, શ્વાસ,શરદી, ખાંસી, એલર્જી, હૃદયરોગ અને ક્ષયના દર્દીઓ માટે ફાયદાકારક મનાઈ રહ્યુ છે. પ્રતિ વર્ષની જેમ આ વર્ષે પણ ભાવનગર શહેર અને જિલ્લામાં શરદ-પૂર્ણિમાના મહિમાવંતા મહાપર્વની પરંપરાગત રીતે હર્ષોલ્લાસભેર ઉજવણી કરાશે. શરદપુનમની રઢીયાળી રાત્રે દૂધપૌઆ આરોગવાનુ આરોગ્યની દ્રષ્ટિએ સર્વોત્તમ હોય આ અવસરે લાખો લોકો ઉંધીયુ,પુરી, દહીંવડા અને ગુલાબજાંબુની સાથોસાથ દૂધપૌઆની પણ જયાફત ઉડાવશે. ગોહિલવાડમાં આ પર્વે હજજારો લોકો ગગનમાંથી વરસતી અમૃતધારાનો લ્હાવો લેવા માટે શહેરની નજીકના પર્યટન સ્થળોએ પરિવારજનો સાથે ઉમટી પડશે. આ મહાપર્વે આકાશમાંના પુનમના ચંદ્રમાં અમૃતના કિરણો વરસાવતા હોય છે. તે અમીરસનો લ્હાવો લેવાનો યુવાનોમાં ખાસ કરીને નવવિવાહિતોમાં સારો એવો ક્રેઝ જોવા મળી રહ્યો છે. આ સાથે એક એવી માન્યતા પણ પ્રવર્તિ રહી છે કે, આ પૂનમની રાત્રીના ચંદ્રના કિરણના સ્નાનથી શરીરની અનેક વ્યાધિઓ પણ શમી જાય છે. તેથી જ વૈદ્યો દ્વારા જે તે દર્દની આયુર્વેદીક દવાઓ પકવવા માટે તે રાતભર ખુલ્લી ચાંદનીમાં પણ મુકી રાખે છે