અમદાવાદમાં લુલુ ગ્રૂપ પોતાનો સૌથી મોટો મોલ બનાવવા જઈ રહ્યો છે જેના માટે જમીન પસંદ કરવામાં આવી છે અને સોદો પણ થઈ ગયો છે. જોકે, મ્યુનિસિપલ કોર્પોરેશને હજુ સુધી જમીનનું પઝેશન સોંપ્યું નથી. આ જમીનના કેટલાક ભાગમાં હજુ વાવેતાર થાય છે. તેના કારણે જમીનનું પઝેશન આપવામાં વિલંબ થાય તેવી સંંભાવના છે.
એક મહિના અગાઉ જ અમદાવાદ મ્યુનિસિપલ કોર્પોરેશને જમીનની હરાજી કરી
લુલુ ગ્રૂપે પોતાનો મોલ બનાવવા માટે 519 કરોડની જમીનની ડીલ કરી હતી
એએમસીનો આ અત્યાર સુધીનો સૌથી મોટો જમીનનો સોદો હતો
દુબઈ સહિત દેશવિદેશમાં ભવ્ય મોલ બનાવવા માટે જાણીતા લુલુ ગ્રૂપે અમદાવાદમાં ભારતનો સૌથી મોટો મોલ બનાવવાનું આયોજન કર્યું છે અને 519 કરોડ રૂપિયામાં જમીનનો સોદો પણ કરી નાખ્યો છે. પરંતુ આ સોદામાં માલિકીને લગતી અડચણ પેદા થઈ છે. હજુ એક મહિના અગાઉ જ અમદાવાદ મ્યુનિસિપલ કોર્પોરેશને જમીનની હરાજી કરી ત્યારે લુલુ ગ્રૂપે પોતાના મોલ માટે ડીલ કરી હતી અને મીડિયામાં તેની ભારે ચર્ચા થઈ હતી. એએમસીનો આ અત્યાર સુધીનો સૌથી મોટો સોદો હતો.
લુલુ ગ્રૂપ સાથે 519 કરોડમાં જમીનનો સોદો થયો છે, પરંતુ એએમસી હજુ સુધી લુલુ ગ્રૂપને જમીનનો સંપૂર્ણ કબ્જો આપી શક્યું નથી. અમદાવાદના ચાંદખેડા એરિયામાં 66,168 ચોરસ મીટરનો પ્લોટ 78,500 રૂપિયા પ્રતિ ચોરસ મીટરના ભાવે લુલુ ઈન્ટરનેશનલ શોપિંગ મોલ્સ પ્રાઈવેટ લિમિટેડને વેચવામાં આવશે, પરંતુ આ પ્લોટમાં લગભગ 10,672 મીટર જેટલી જમીનમાં ખેતી થાય છે અને એએમસીએ હજુ આ પ્લોટનો સંપૂર્ણ કબ્જો મેળવવાનો બાકી છે.
18મી જૂને એએમસીએ ચાંદખેડા અને મોટેરા વિસ્તારમાં જમીનના પાંચ પ્લોટના સોદા કર્યા હતા. તેમાં લુલુ ઈન્ટરનેશનલ સૌથી મોટી બિડર તરીકે વિજેતા નીવડી હતી અને ચાંદખેડાના પ્લોટ માટે સૌથી ઊંચી બોલી લગાવી હતી. આ પ્લોટનો બેઝ ભાવ 502.87 કરોડ રૂપિયા રાખવામાં આવ્યો હતો પ્લોટનું વેચાણ 519 કરોડમાં થયું હતું. સ્ટેન્ડિંગ કમિટીએ પ્લોટ 99 વર્ષની લીઝ પર આપવાના બદલે તેનું વેચાણ કરવા માટે મંજૂરી આપી હતી. જૂનમાં થયેલી હરાજીમાં અમદાવાદ મ્યુનિસિપલ કોર્પોરેશનને કુલ મળીને 937 કરોડ રૂપિયા મળવાના હતા.
હવે મ્યુનિસિપલ કોર્પોરેશનના એક સિનિયર અધિકારીએ સ્વીકાર્યું છે કે મોટા ભાગના પ્લોટના વેચાણ માટે જે આવશ્યક ફોર્માલિટી પૂરી કરવાની હોય તે થઈ શકી નથી. ખાસ કરીને ચાંદખેડામાં લુલુ ગ્રૂપને જે જમીન વેચવામાં આવી છે તેની માલિકીને લઈને અમુક સમસ્યા પેદા થઈ છે. આ સોદો તો થઈ ગયો છે, પરંતુ એએમસીએ પ્લોટનું પઝેશન હજુ ટ્રાન્સફર નથી કર્યું. 66,168 ચોરસ મીટરમાંથી 55,000 ચોરસ મીટર જમીન લુલુ ગ્રૂપને ટ્રાન્સફર કરવાના પ્રયાસ ચાલે છે. જૂન મહિનામાં મ્યુનિસિપલ કોર્પોરેશને 22 પ્લોટ વેચાણ માટે મૂક્યા હતા તેમાંથી 6 પ્લોટ માટે ખરીદદાર મળ્યા હતા. હવે પઝેશનમાં વિલંબના કારણે આખા પ્રોજેક્ટમાં મોડું થઈ શકે છે.
એસ્ટેટ ડિપાર્ટમેન્ટના એક ટોચના અધિકારીએ જણાવ્યું કે સ્ટેન્ડિંગ કમિટિની મંજૂરી મળવાની એક મહત્ત્વની પ્રક્રિયા માટે હજુ રાહ જોવાઈ રહી છે. તેના કારણે પાઈપલાઈનમાં રહેલા રિયલ એસ્ટેટ પ્રોજેક્ટને અસર થઈ શકે છે.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે નીચે આપેલી લીંક પર ક્લિક કરીને જોડાઓ અસ્મિતા ન્યુઝ સાથે.
તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
