- ઈરાનમાં એક ખૂબ જ મોટો અકસ્માત સર્જાયો છે. તેહરાનથી લગભગ 540 કિલોમીટર દૂર તાબાસમાં કોલસાની ખાણમાં વિસ્ફોટ થયો છે, જેમાં ઓછામાં ઓછા 30 લોકોના મોત થયા છે.
લેબનોનમાં ઈરાન સમર્થિત હિઝબુલ્લાહ પર ઇઝરાયલના હુમલા વચ્ચે ઈરાનમાં એક મોટી દુર્ઘટના ઘટી છે. પૂર્વી ઈરાનમાં કોલસાની ખાણમાં મિથેન ગેસ લીક થવાને કારણે જોરદાર વિસ્ફોટ થયો છે. આ દુર્ઘટનામાં અત્યાર સુધીમાં 30 લોકોએ જીવ ગુમાવ્યા છે અને 17 લોકો ઘાયલ થયા હોવાની માહિતી સામે આવી છે. ઈરાનના સરકારી મીડિયા અનુસાર ખાણમાં હજુ 24 અન્ય લોકો ફસાયેલા છે.
ખાણમાં કામ કરી રહ્યા હતા 70 લોકો
સરકારી મીડિયાના અહેવાલો અનુસાર, આ દુર્ઘટના ઈરાનની રાજધાની તેહરાનથી લગભગ 540 કિલોમીટર દક્ષિણ-પૂર્વમાં સ્થિત તાબાસમાં સ્થિત કોલસાની ખાણમાં શનિવારે મોડી રાત્રે ઘટી હતી. આ પ્રચંડ વિસ્ફોટ બાદ ઇમરજન્સી કર્મચારીઓને ઘટનાસ્થળે મોકલવામાં આવ્યા છે. વિસ્ફોટ સમયે લગભગ 70 લોકો ત્યાં કામ કરી રહ્યા હતા. સરકારી ટીવી અનુસાર ખાણમાં હજુ 24 લોકો ફસાયેલા છે.
રાષ્ટ્રપતિએ આપ્યો મદદ કરવાનો આદેશ
પ્રાંતીય ગવર્નર મોહમ્મદ જાવદ કેનાતે સરકારી ટીવીને જણાવ્યું કે 30 લોકો માર્યા ગયા અને 17 ઘાયલ થયા છે. ઈરાનના નવા રાષ્ટ્રપતિ મસૂદ પેજેશ્કિયાને ફસાયેલા લોકોને બચાવવા અને તેમના પરિવારોને મદદ કરવાનો આદેશ આપ્યો. તેમણે એમ પણ કહ્યું કે ઘટનાની તપાસ શરૂ કરી દેવામાં આવી છે.
ખનિજોથી સમૃદ્ધ છે ઈરાન
તેલ ઉત્પાદક ઈરાન અનેક પ્રકારના ખનિજોથી પણ સમૃદ્ધ છે. ઈરાન દર વર્ષે લગભગ 3.5 મિલિયન ટન કોલસાનો વપરાશ કરે છે, પરંતુ તે દર વર્ષે તેની ખાણોમાંથી માત્ર 1.8 મિલિયન ટન કોલસો જ કાઢી શકે છે. બાકીનો કોલસો આયાત કરવામાં આવે છે.
ક્યારે-ક્યારે બની દુર્ઘટનાઓ
2013 માં, ઈરાનમાં બે અલગ-અલગ ખાણ દુર્ઘટનાઓમાં 11 કામદારોએ જીવ ગુમાવ્યો હતો. 2009માં અનેક ઘટનાઓમાં 20 કર્મચારીઓના મોત થયા હતા. 2017માં કોલસાની ખાણમાં થયેલા વિસ્ફોટનો ભોગ 42 લોકો બન્યા હતા.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે નીચે આપેલી લીંક પર ક્લિક કરીને જોડાઓ અસ્મિતા ન્યુઝ સાથે.
તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
