Social Media Ban : બાળકોને સોશિયલ મીડિયાથી દૂર રાખવા જોઈએ તેવી વાતો વચ્ચે હવે ઓસ્ટ્રેલીયાથી મોટા સમાચાર સામે આવ્યા છે. વાસ્તવમાં ઓસ્ટ્રેલિયામાં 16 વર્ષથી ઓછી ઉંમરના બાળકો માટે સોશિયલ મીડિયા પર પ્રતિબંધ મૂકવા કવાયત હાથ ધરાઇ છે. ગુરુવારે વડા પ્રધાન એન્થોની અલ્બેનિસે કહ્યું કે, સરકાર એક નવો કાયદો બનાવી રહી છે, જે હેઠળ 16 વર્ષથી ઓછી ઉંમરના બાળકો માટે સોશિયલ મીડિયાના ઉપયોગ પર પ્રતિબંધ હશે. એક ન્યૂઝ કોન્ફરન્સ દરમિયાન તેમણે જણાવ્યું કે, આ નિયમ બાળકોના માતા-પિતા માટે લાવવામાં આવ્યો છે.
બાળકોને નુકસાન પહોંચાડી રહ્યું છે સોશિયલ મીડિયા
ન્યૂઝ કોન્ફરન્સ દરમિયાન બોલતા એન્થોની અલ્બેનિસે કહ્યું કે, સોશિયલ મીડિયા આપણા બાળકોને નુકસાન પહોંચાડી રહ્યું છે અને તેને રોકવાનો સમય આવી ગયો છે. તેમણે કહ્યું કે, આ કાયદો આ વર્ષે સંસદમાં રજૂ કરવામાં આવશે અને ધારાશાસ્ત્રીઓ દ્વારા તેને બહાલી આપ્યાના 12 મહિના પછી અમલમાં આવશે. એન્થોની અલ્બેનિસે એ પણ ભાર મૂક્યો હતો કે, જે વપરાશકર્તાઓ તેમના માતાપિતાની સંમતિ વિના સોશિયલ મીડિયાનો ઉપયોગ કરવા માગે છે તેમને આમ કરવાની પરવાનગી આપવામાં આવશે નહીં.
સોશિયલ મીડિયા પ્લેટફોર્મની જવાબદારી
કોન્ફરન્સમાં આગળ બોલતા એન્થોની અલ્બેનિસેએ જણાવ્યું હતું કે, સોશિયલ મીડિયા પ્લેટફોર્મ પર તેની ખાતરી કરવાની જવાબદારી રહેશે કે તેઓ ઍક્સેસને રોકવા માટે યોગ્ય પગલાં લઈ રહ્યાં છે. આ માટે માતાપિતા અથવા બાળકોની કોઈ જવાબદારી રહેશે નહીં.
આ તરફ કોમ્યુનિકેશન મિનિસ્ટર મિશેલ રોલેન્ડે કહ્યું કે, મેટાના સોશિયલ મીડિયા પ્લેટફોર્મ ઈન્સ્ટાગ્રામ અને ફેસબુક પ્લેટફોર્મની યાદીમાં છે. આ સાથે ByteDanceના TikTok અને Elon Muskના X પર પણ પ્રતિબંધ મૂકવામાં આવશે. એવી અપેક્ષા છે કે, આલ્ફાબેટનું યુટ્યુબ પણ આ યાદીમાં સામેલ થઈ શકે છે.
તમને જણાવી દઈએ કે અત્યાર સુધી કંપનીઓએ આ અંગે કોઈ પ્રતિક્રિયા આપી નથી. આ પહેલા પણ ઘણા દેશોએ આ કાયદા દ્વારા બાળકો દ્વારા સોશિયલ મીડિયાના ઉપયોગ પર રોક લગાવવાની પ્રતિજ્ઞા લીધી છે જોકે ઓસ્ટ્રેલિયાની નીતિ સૌથી કડક છે. આ યાદીમાં ફ્રાન્સનું નામ સામેલ છે જેણે ગયા વર્ષે 15 વર્ષથી ઓછી ઉંમરના લોકો માટે સોશિયલ મીડિયા પર પ્રતિબંધ મૂકવાનો પ્રસ્તાવ મૂક્યો હતો. અમેરિકાએ સોશિયલ મીડિયા પ્લેટફોર્મને 13 વર્ષથી ઓછી ઉંમરના બાળકોનો ડેટા એક્સેસ કરવા માટે માતા-પિતાની પરવાનગી લેવા માટે પણ સૂચના આપી છે.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે નીચે આપેલી લીંક પર ક્લિક કરીને જોડાઓ અસ્મિતા ન્યુઝ સાથે.
તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
