Israel Hamas War Latest News : દેશના ભૂતપૂર્વ ન્યાયાધીશો, રાજદ્વારીઓ, કાર્યકર્તાઓ, લેખકો અને અર્થશાસ્ત્રીઓ સહિત દેશના 25 નાગરિકોના એક જૂથે રક્ષા મંત્રી રાજનાથ સિંહને પત્ર લખીને ઇઝરાયેલને શસ્ત્રો અને દારૂગોળાની નિકાસ કરવાનું લાઇસન્સ રદ કરવા વિનંતી કરી
Israel Hamas War : ઈઝરાયેલ અને હમાસ યુદ્ધ વચ્ચે હવે વધુ એક મોટી અપડેટ સામે આવી છે. વાસ્તવમાં બંને એકબીજા પર આત્મઘાતી હુમલા કરી રહ્યા છે. આ દરમિયાન ઈઝરાયેલે સ્પષ્ટ કર્યું છે કે, તે હમાસને નષ્ટ કરશે. આ દરમિયાન ઈરાનમાં રહેતા હમાસના વડા ઈસ્માઈલ હાનિયાની પણ હત્યા કરવામાં આવી હતી. કહેવામાં આવી રહ્યું છે કે, આમાં ઈઝરાયેલનો હાથ છે. આ ઘટના બાદ ઈરાન અને અન્ય દેશો પણ યુદ્ધમાં જોડાય તેવી શક્યતા છે. ભારત પણ આ બાબત પર નજર રાખી રહ્યું છે. જોકે આ બધાની વચ્ચે મોટી અપડેટ સામે આવી છે કે, મોટા યુદ્ધના વધતા જતા ખતરા વચ્ચે દેશના ભૂતપૂર્વ ન્યાયાધીશો, રાજદ્વારીઓ, કાર્યકર્તાઓ, લેખકો અને અર્થશાસ્ત્રીઓ સહિત દેશના 25 નાગરિકોના એક જૂથે રક્ષા મંત્રી રાજનાથ સિંહને પત્ર લખીને ઇઝરાયેલને શસ્ત્રો અને દારૂગોળાની નિકાસ કરવાનું લાઇસન્સ રદ કરવા વિનંતી કરી છે.
જૂથે પત્રમાં ચિંતા વ્યક્ત કરી
દેશના ભૂતપૂર્વ ન્યાયાધીશો, રાજદ્વારીઓ, કાર્યકર્તાઓ, લેખકો અને અર્થશાસ્ત્રીઓ સહિત દેશના 25 નાગરિકોના એક જૂથે રાજનાથ સિંહને લખેલ પત્રમાં કહેવામાં આવ્યું છે કે, અમે ઇઝરાયેલને લશ્કરી શસ્ત્રો અને યુદ્ધ સામગ્રીની સપ્લાય માટે વિવિધ ભારતીય કંપનીઓને નિકાસ લાયસન્સ અને પરવાનગીઓ ચાલુ રાખવા અંગે ચિંતિત છીએ. ઈન્ટરનેશનલ કોર્ટ ઓફ જસ્ટિસ (ICJ) એ સ્પષ્ટ ચુકાદો આપ્યો છે કે, ઈઝરાયેલ તેની જવાબદારીઓનું ઉલ્લંઘન કરી રહ્યું છે.
કંપનીઓને લાયસન્સ ન આપવા માંગ
30મી જુલાઈના રોજ લખવામાં આવેલા પત્રમાં કહેવામાં આવ્યું છે કે, ઈઝરાયેલને કોઈપણ સૈન્ય સામગ્રીનો સપ્લાય એ આંતરરાષ્ટ્રીય માનવતાવાદી કાયદા હેઠળની ભારતની જવાબદારીઓ અને ભારતના બંધારણના અનુચ્છેદ 51(c) સાથે વાંચવામાં આવેલા અનુચ્છેદ 21ના આદેશનું ઉલ્લંઘન હશે. તેથી અમે તમને પ્રશ્નમાં નિકાસ લાયસન્સ રદ કરવા અને ઈઝરાયેલને લશ્કરી સાધનો સપ્લાય કરતી કંપનીઓને કોઈપણ નવા લાઇસન્સ આપવાનું બંધ કરવા વિનંતી કરીએ છીએ.
ભારતીય કંપનીઓ ઇઝરાયેલની કંપનીઓ સાથે કરી રહી છે કામ
નોંધનિય છે કે, ભારતની ઘણી સરકારી અને ખાનગી કંપનીઓ હથિયાર બનાવવા માટે ઈઝરાયેલની ડિફેન્સ પ્રોડક્શન કંપનીઓ સાથે કામ કરી રહી છે. આ ભારતીય કંપનીઓ ઇઝરાયેલની કંપનીઓ માટે તેમના ઉત્પાદનોના વધુ ભાગોનું ઉત્પાદન કરે છે. પત્રમાં ત્રણ ભારતીય કંપનીઓ મ્યુનિશન્સ ઈન્ડિયા લિમિટેડ (MIL), પ્રીમિયર એક્સપ્લોસિવ્સ લિમિટેડ (PEL) અને અદાણી-એલ્બિટ એડવાન્સ્ડ સિસ્ટમ્સ ઈન્ડિયા લિમિટેડનો ઉલ્લેખ છે.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે નીચે આપેલી લીંક પર ક્લિક કરીને જોડાઓ અસ્મિતા ન્યુઝ સાથે.
તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
