લોકસભા ચૂંટણીમાં 400+નો આંકડો મેળવવા માટે ભાજપે સ્થાનિક પાર્ટીઓ સાથે ગઠબંધન કરવાનું શરુ કર્યું છે. કેટલાંક અંશે ભાજપને તેમાં સફળતા પણ મળી છે. પરંતુ અહેવાલો અનુસાર એનડીએ પંજાબમાં નિષ્ફ્ળતા મળી છે. ગઠબંધનને લઈને ભાજપ અને અકાલી દળ વચ્ચે છેલ્લા કેટલાક સમયથી વાતચીત ચાલી રહી હતી. હવે સૂત્રોને ટાંકીને મોટા સમાચાર સામે આવી રહ્યા છે, જે મુજબ પંજાબમાં અકાલી દળ અને બીજેપી ગઠબંધન વચ્ચેની વાતચીત નિષ્ફળ ગઈ છે.
પંજાબમાં આમ આદમી પાર્ટી અને કોંગ્રેસ એકસાથે ચૂંટણી નહીં લડવાની જાહેરાત બાદ ભાજપે પોતાની રણનીતિ બદલી છે. સૂત્રોના જણાવ્યા અનુસાર અકાલી દળ પણ ખેડૂતોના આંદોલન અને શીખ કેદીઓને મુક્ત કરવાના મુદ્દાઓને લઈને ભાજપ પર દબાણ બનાવી રહ્યું હતું. આ ઉપરાંત પંજાબનું ભાજપ નેતૃત્વ પણ ગઠબંધનના પક્ષમાં ન હતું.
આ કારણે ભાજપ-અકાલીનો રસ્તો અલગ થઈ ગયો
જ્યારે કેન્દ્ર સરકાર ખેડૂતો માટે નવા કૃષિ કાયદા લાવી હતી, ત્યારે અકાલી દળે તેના વિરોધમાં NDA સાથેના સંબંધો તોડી નાખ્યા હતા. તે પછી અકાલી દળે બહુજન સમાજ પાર્ટી સાથે ગઠબંધન કરીને પંજાબ વિધાનસભાની ચૂંટણી લડી હતી.
થોડા સમય પહેલા અકાલી દળના સૂત્રોએ જણાવ્યું હતું કે ભાજપ પંજાબની 13માંથી 6 લોકસભા સીટો પર ચૂંટણી લડવાની માંગ કરી રહી છે, જ્યારે અકાલી દળ આટલી સીટો આપવા તૈયાર નથી. જ્યારે અકાલી દળ એનડીએનો ભાગ હતો ત્યારે તે 10 બેઠકો પર ચૂંટણી લડી રહ્યું હતું અને ભાજપ ત્રણ બેઠકો પર ચૂંટણી લડી રહ્યું હતું.
આમ તો, હાલમાં પંજાબમાં અકાલી દળ અને બહુજન સમાજ પાર્ટી વચ્ચે ગઠબંધન છે. એવું કહેવામાં આવી રહ્યું છે કે તેઓ આ ગઠબંધન તોડવા માંગતા નથી કારણ કે પંજાબમાં બસપાનો સારો પ્રભાવ છે. સુખદેવ સિંહ ઢિંડસાનું જૂથ પણ અકાલી દળમાં જોડાય તેવી ચર્ચા છે.
તે જ સમયે, અકાલી નેતાઓનો આરોપ છે કે ભાજપે પંજાબમાં અકાલી દળને નબળું પાડવાનો પ્રયાસ પણ કર્યો છે. ભાજપે અકાલી દળના નારાજ નેતાઓને પોતાની પાર્ટીમાં સામેલ કર્યા જેથી અકાલીની વોટબેંક તેમાં ટ્રાન્સફર થઈ શકે. જલંધર લોકસભા પેટાચૂંટણીમાં પણ ભાજપે ચરણજીત સિંહ અટવાલના પુત્ર ઈન્દર સિંહ અટવાલને ઉમેદવાર બનાવ્યા હતા.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે નીચે આપેલી લીંક પર ક્લિક કરીને જોડાઓ અસ્મિતા ન્યુઝ સાથે.
તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
