બ્રહ્મપુત્ર નદીની નીચે બનશે ચીનથી પણ લાંબી દેશની પહેલી અંડર વોટર ટનલ

ટનલની અંદરથી સૈન્ય વાહનો અને હથિયારથી સજ્જ વાહનોને 80 કિમી પ્રતિ કલાકની ઝડપે દોડાવી શકાશે

પૂર્વીય લદ્દાખની ગાલવાન ઘાટીમાં ભારત અને ચીનની સેનાઓ વચ્ચે થયેલી હિંસક અથડામણ બાદ એક તરફ સૈન્ય કમાન્ડરની વાતચીત ચાલુ છે તો બીજી બાજુ કેન્દ્ર સરકારે અરૂણાચલ પ્રદેશથી આસામ સુધી માર્ગ પરિવહન મજબૂત કરવાની કવાયત તેજ કરી દીધી છે. કેન્દ્ર સરકારે બ્રહ્મપુત્ર નદી નીચે 14.85 કિમીની ટનલ બનાવવા સૈદ્ધાંતિક મંજૂરી આપી દીધી છે. પ્રથમ વખત દેશમાં નદી નીચે બનનારી ટનલ પૂર્વીય ચીનના તાઈહૂ સરોવર નીચે બની રહેલી ટનલ કરતા વધુ લાંબી હશે.

કેન્દ્ર સરકારે આસામના ગોહપુર (એનએચ-54)થી નુમાલીગઢ (એનએચ-37)ને જોડવા બ્રહ્મપુત્ર નદી નીચે ચાર લેનની સડક ટનલ બનાવવાની યોજનાને સૈદ્ધાંતિક મંજૂરી આપી છે. જાણવા મળ્યા મુજબ સડક પરિવહન અને રાજમાર્ગ મંત્રાલયના સાર્વજનિક ઉપક્રમે રાષ્ટ્રીય રાજમાર્ગ ઈન્ફ્રાસ્ટ્રક્ચર વિકાસ નિગમ લિમિટેડ (એનએચએઆઈડીસીએલ) એ અમેરિકી કંપની તરફથી નદી નીચે તૈયાર થનારી ટનલના ડિટેઈલ પ્રોજેક્ટ રિપોર્ટ (ડીપીઆર)ને મંજૂરી આપી છે. અમેરિકાની લુઈસ બર્જર કંપનીએ બ્રહ્મપુત્ર નદી નીચે  14.85 કિમી લાંબી ટનલ બનાવવા પ્રી-ફિઝિબિલટી રિપોર્ટ અને ડીપીઆર તૈયાર કર્યો છે.

આ ટનલની ખાસ વાત એ હશે કે તેના અંદરથી સૈન્ય વાહનો અને હથિયારથી સજ્જ વાહનોને 80 કિમી પ્રતિ કલાકની ઝડપે દોડાવી શકાશે. આ ટનલ આસામ અને અરૂણાચલ પ્રદેશને જોડવાના દૃષ્ટિકોણથી ખૂબ મહત્વની સાબિત થઈ શકે છે. જાણવા મળ્યા મુજબ આ ટનલને તૈયાર કરવાની તમામ પ્રક્રિયા પૂર્ણ થઈ ગઈ છે અને ડિસેમ્બરમાં આ ટનલ પર કામ શરૂ કરવામાં આવશે.

ચીનમાં બની રહી છે 10.79 કિમીની ટનલ

પૂર્વીય ચીનના તાઈહૂ સરોવર નીચે બની રહેલી સડક પરિવહન ટનલની લંબાઈ 10.79 કિમી છે. તાઈહૂ સરોવર નીચે માત્ર એક જ ટનલ બની રહી છે જ્યારે બ્રહ્મપુત્ર નદી નીચે બની રહેલી ટનલમાં આવવા અને જવા માટે અલગ અલગ રસ્તાઓ હશે. તે સિવાય ટનલની અંદર પાણી ન પ્રવેશે તે માટે અનેક સુરક્ષા ઘેરા પણ તૈયાર કરાઈ રહ્યા છે.

ટનલની વિશેષતા

14 કિમી લાંબી ટનલનું નિર્માણ કાર્ય જેટલું મુશ્કેલ છે તેટલું જ તેમાં મુસાફરી કરવું પણ અઘરૂં હશે. હકીકતે પાણીની અંદર ટનલમાં હવાનું દબાણ ખૂબ ઓછું હશે માટે આ સંજોગોમાં ટનલની અંદર તાજી હવા માટે વેન્ટિલેશન સિસ્ટમ, ફાયર ફાઈટિંગ, લાઈટની વ્યવસ્થા અને ઈમરજન્સી એક્ઝિટ વગેરે સુવિધાઓ પણ આપવામાં આવશે