ગુજરાત વિધાનસભા ઇલેકશન : દિલ્હી સીએમ અરવિંદ કેજરીવાલ ફરી આવશે ગુજરાતમાં

ગુજરાત વિધાનસભાની ચૂંટણીને હવે વેઢે ગણાય તેટલા મહિના રહ્યાં છે ત્યારે વિધાનસભાની ચૂંટણી માટે એક પછી એક રાષ્ટ્રીય નેતા ગુજરાતની મુલાકાતે આવી રહ્યા છે. ગુજરાતમાં જેમ જેમ ચૂંટણી નજીક આવી રહી છે તેમ તેમ રાજકીય માહોલ ગરમ થઈ રહ્યો છે. ગુજરાતમાં પ્રધાનમંત્રી નરેન્દ્ર મોદી અને કેન્દ્રીય ગૃહમંત્રી અમિત શાહ ઉપરાંત ભાજપના રાષ્ટ્રીય અધ્યક્ષ જે.પી નડ્ડા આવી ચુક્યા છે તો આમ આદમી પાર્ટીના સંયોજક અને દિલ્હી સીએમ અરવિંદ કેજરીવાલ, ઉપમુખ્યમંત્રી મનીષ સીસોદીયા પર ગુજરાતના પ્રવાસે આવી ગયા છે. આમ આદમી પાર્ટીના રાઘવ ચઢા પણ ગુજરાતની મુલાકાતે આવી ગયા છે ત્યારે ફરી એક વખત વિધાનસભાની ચૂંટણીના પ્રચાર માટે દિલ્હી સીએમ અરવિંદ કેજરીવાલ ગુજરાત આવી રહ્યા છે.

ગુજરાતમાં આ વર્ષે વિધાસસભાની ચૂંટણીમાં આમ આદમી પાર્ટી ગુજરાતની તમામ સીટ પર ચૂંટણી લડવાની હોય તે માટે ગુજરાતમાં જોરસોરથી પ્રચાર કરી રહી છે. દિલ્હીના સીએમ અરવિંદ કેજરીવાલ આ વખતે ગુજરાતમાં પાંચ જનસભાને સંબોધન કરશે અને મતદારોને રીઝવવાનો પ્રયત્ન કરશે. અરવિંદ કેજરીવાલ દ્વારા ગુજરાત વિધાનસભાની ચૂંટણી માટે મિશન મોડથી કાર્ય કરી રહ્યા છે તેવું લાગી રહ્યું છે. આમ આદમી પાર્ટીનો પ્રચાર ખુબ જ ગતિથી થઇ રહ્યો છે તેવામાં અરવિંદ કેજરીવાલના બે દિવસના પ્રવાસ દરમિયાન 5 જેટલી જંગી સભાઓને સંબોધન કરશે. દિલ્હી સીએમ આગામી 8મી તારીખ અને 9મી તારીખે ગુજરાતની મુલાકાતે આવશે. નોંધનીય છે કે પ્રધાનમંત્રી નરેન્દ્ર મોદી પણ આગામી દિવસોમાં ગુજરાતના પ્રવાસે આવી રહ્યા છે તે પહેલા જ ગુજરાતમાં ચૂંટણી પ્રચાર કરશે અરવિંદ કેજરીવાલ. આ વખતે આમ આદમી પાર્ટીના સંયોજક અરવિંદ કેજરીવાલ નવી જાહેરાત કરી શકે છે. આ પહેલા મફત વીજળી, રોજગારી, જૂની પેન્સન યોજના જેવી મોટી જાહેરાત કરી ચુક્યા છે ત્યારે હવે જોવાનું રહેશે કે કેજરીવાલ ગુજરાતની જનતાને કયો નવો વાયદો આપશે.

ગુજરાતમાં આમ આદમી પાર્ટીની સીધી ટક્કર ભાજપ સાથે થઇ ગઈ છે. ગુજરાતમાં વિધાનસભાની ચૂંટણીની તારીખની જાહેરાત કરવામાં આવી નથી તેમ છતાં આમ આદમી પાર્ટીએ પોતાના ઉમેદવારોનું લિસ્ટ જાહેર કર્યું છે. આમ આદમી પાર્ટી સોસીયલ મીડિયાથી લઈને લોક સંપર્ક સુધી ચૂંટણી પ્રચાર કરી રહી છે. આ વર્ષે વિધાનસભાની ચૂંટણી ત્રિપાંખીયો જંગ થઇ રહ્યો છે.