અમદાવાદ-વડોદરા એક્સપ્રેસ વે પર મોડી રાત્રે ગમખ્વાર અકસ્માત સર્જાયો હતો અને અહીં ટ્રિપલ અકસ્માત સર્જાયો હતો, જેમાં એક ડ્રાઇવરનું મોત થયું છે. જ્યારે ઈજાગ્રસ્ત લોકોને નડિયાદની હોસ્પિટલમાં સારવાર માટે દાખલ કરવામાં આવ્યા છે. અકસ્માતને કારણે રસ્તા પર કલાકો સુધી ટ્રાફિક જામ થઈ ગયો હતો.
આ ઘટનાની મળતી માહિતી મુજબ રાત્રે સવા નવ વાગ્યા આસપાસ નડિયાદથી અમદાવાદ તરફ આવી રહેલો ટ્રેલર રોડની સાઇડમાં ઉભા રહેલા આઇસરની પાછળ ધડાકાભેર અથડાયો હતો અને અકસ્માતને કારણે ટ્રેલરની કેબિનમાં રહેલા સિલિન્ડરમાં બ્લાસ્ટ થયો અને આગ ફાટી નીકળી હતી. જેમાં ટ્રેલરનો ડ્રાઇવર જીવતો સળગી ગયો હતો. આ દરમિયાન પાછળથી આવી રહેલા અન્ય ટ્રકના ડ્રાઇવરે અકસ્માતથી બચવાના પ્રયાસમાં સ્ટિયરિંગ પર કાબુ ગુમાવી દીધો હતો. તેનો ટ્રક રોડની બીજી તરફ પટકાયો હતો. જેના કારણે ઓઇલ રસ્તા પર ઢોળાયું હતું.
આ સમગ્ર ઘટનાની જાણ અમદાવાદ ફાયરબ્રિગેડને કરવામાં આવી હતી. જેથી અમદાવાદના ફાયર ઓફિસર ઓમ જાડેજા સહિતનો કાફલો ઘટનાસ્થળે દોડી આવ્યો હતો અને આગ પર કાબૂ મેળવી અકસ્માતગ્રસ્ત વાહનોને સાઇડમાં કરી અમદાવાદ-વડોદરા એક્સપ્રેસ હાઇવે પર ટ્રાફિક યથાવત કર્યો હતો જોકે આ દરમિયાન કલાકો સુધી હાઈવ પર ટ્રાફિક જામના દ્રશ્યો રહ્યા હતા.
તો બીજી તરફ આજે વહેલી સવારે વડોદરા-અમદાવાદ એક્સપ્રેસ હાઇવે પર ગાઢ ધુમ્મસ રહેતા વડોદરાથી અમદાવાદ અને અમદાવાદથી વડોદરા તરફ આવનાર વાહન ચાલકો મુશ્કેલીમાં મુકાઇ ગયા હતા અને ગાઢ ધુમ્મસના કારણે વિઝિબિલિટી લગભગ 10થી 15 ફૂટ સુધી રહેતા આગળના વાહનો દેખાવા મુશ્કેલ થઇ ગયા હતા. જેથી ધુમ્મસના કારણે કોઇ અકસ્માત ન સર્જાય તે માટે એક્સપ્રેસ હાઇવે ઓથોરીટી દ્વારા ડિઝીટલ ડિસ્પ્લે તેમજ ટોલ નાકા ઉપર લગાવેલા લાઉડ સ્પિકર દ્વારા વાહનો ધીમે ચલાવવા માટે સતત એનાઉન્સ કરવામાં આવ્યું હતું.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે નીચે આપેલી લીંક પર ક્લિક કરીને જોડાઓ અસ્મિતા ન્યુઝ સાથે.
તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
