ફાસ્ટ બોલર અર્શદીપ સિંહે મેચની છેલ્લી ઓવરમાં જોરદાર બોલિંગ કર્યું. સાઉથ આફ્રિકાને હરાવીને ટીમ ઇન્ડિયા 4 મેચની સીરીઝમાં 2-1થી આગળ થઈ ગઈ છે.
ભારતે ત્રીજી T20 મેચમાં દક્ષિણ આફ્રિકાને છેલ્લી ઓવરમાં હરાવી દીધું. ટીમ ઇન્ડિયાએ યજમાન ટીમને 11 રને હરાવીને 4 મેચની સીરીઝમાં 2-1ની લીડ મેળવી લીધી. દક્ષિણ આફ્રિકાને જીતવા માટે છેલ્લી ઓવરમાં 25 રનની જરૂર હતી. ફાસ્ટ બોલર અર્શદીપ સિંહે મેચની છેલ્લી ઓવરમાં 13 રન આપ્યા અને માર્કો જાનસેનને આઉટ કરીને ભારતને જીત અપાવી. જ્યારે યાનસેન બેટિંગ કરી રહ્યો હતો ત્યારે એવું લાગતું હતું કે કદાચ મેચ ભારતના હાથમાંથી સરકી જશે પરંતુ અર્શદીપે છેલ્લી ઓવરમાં શાનદાર બોલિંગ કરીને મેચ પલટી દીધી. તેણે ટીમ ઇન્ડિયાને યાદગાર જીત અપાવી જે લાંબા સમય સુધી યાદ રહેશે.
મેચની છેલ્લી ઓવરના પહેલા બોલ પર અર્શદીપ સિંહને ગેરાલ્ડ કોએત્ઝીએ લેગ બાય કરીને એક રન પૂરો કર્યો. માર્કો યાનસેને બીજા બોલ પર સિક્સર ફટકારી દીધી. આ સાથે જ યાનસેને પોતાની ફિફ્ટી પણ પૂરી કરી. યાનસેને 16 બોલમાં ફિફ્ટી ફટકારી હતી. દક્ષિણ આફ્રિકા તરફથી ટી20માં આ બીજી સૌથી ઝડપી અડધી સદી હતી. આ પછી અર્શદીપે ત્રીજા બોલ પર યાનસેનને LBW આઉટ કરીને ભારતને મોટી સફળતા અપાવી હતી. સિમિલાને ચોથા બોલ પર ચોગ્ગો ફટકાર્યો. સિમિલાને પાંચમા બોલ પર એક રન બનાવ્યો અને ગેરાલ્ડ કોએત્ઝીને સ્ટ્રાઇક આપી. કોએત્ઝીએ છેલ્લા બોલ પર માત્ર એક રન બનાવ્યો હતો.
પ્રથમ બેટિંગ કરતા ભારતે 6 વિકેટે 219 રન બનાવ્યા
ભારતે પ્રથમ બેટિંગ કરવા માટે 6 વિકેટે 219 રન બનાવ્યા હતા. જવાબમાં હેનરિક ક્લાસેન (41)ના આઉટ થયા બાદ દક્ષિણ આફ્રિકાની આશા લગભગ ખતમ થતી જણાતી હતી જ્યારે તેને 14 બોલમાં 53 રન બનાવવાના હતા. જો કે માર્કો જેન્સન આક્રમક ઇરાદા સાથે આવ્યો અને તેણે 17 બોલમાં પાંચ છગ્ગા અને ચાર ચોગ્ગાની મદદથી યજમાન ટીમને મેચમાં પરત લાવવાનો પ્રયાસ કર્યો. ચોથી અને છેલ્લી મેચ શુક્રવારે રમાશે. દક્ષિણ આફ્રિકા માટે ક્લાસેને 22 બોલમાં 41 રન બનાવ્યા. દક્ષિણ આફ્રિકાની ટીમ 7 વિકેટે 208 રન જ બનાવી શકી.
રિકલ્ટન ફરી નિષ્ફળ રહ્યો
રિકી રિકલ્ટન (20) ફરી એકવાર નિષ્ફળ ગયો. રીઝા હેન્ડ્રિક્સ (21)ને પણ વરુણ ચક્રવર્તીએ આઉટ કર્યો. દક્ષિણ આફ્રિકાના કેપ્ટન એડન માર્કરામ (29)એ ઓફ સ્ટમ્પની બહાર જઈ રહેલા બોલ પર શોટ રમવાનો પ્રયાસ કરતા પોતાની વિકેટ ગુમાવી દીધી. જ્યારે ટ્રિસ્ટન સ્ટબ્સને અક્ષર પટેલે આઉટ કર્યો. ક્લાસેને ત્રણ સિક્સર ફટકારી. બીજી તરફ હાર્દિક પંડ્યાએ ડેવિડ મિલર (18)ને અક્ષરના હાથે કેચ કરાવ્યો. અગાઉ ભારતીય ઇનિંગમાં તિલકને અભિષેક વર્માનો સાથ મળ્યો જેણે 50 રનની આક્રમક ઇનિંગ રમી.
તિલકે 107 રનની અણનમ ઇનિંગ રમી
22 વર્ષના તિલક વર્માએ 107 રનની અણનમ ઇનિંગમાં સાત સિક્સર અને આઠ ફોર ફટકારી. તેની ઇનિંગ્સની મદદથી ભારતે દક્ષિણ આફ્રિકા સામે T20 ફોર્મેટમાં બીજો સૌથી મોટો સ્કોર બનાવ્યો. ખરાબ ફોર્મમાંથી બહાર આવી રહેલા અભિષેકે 25 બોલમાં પાંચ છગ્ગા અને ત્રણ ચોગ્ગાની મદદથી 50 રન બનાવ્યા. તિલક આત્મવિશ્વાસ સાથે રમ્યા અને મેદાનની ચારે બાજુ સ્ટ્રોક માર્યા. તેણે અભિષેક સાથે બીજી વિકેટ માટે 107 રન જોડ્યા. આ પહેલા સંજુ સેમસન ખાતુ ખોલાવ્યા વગર જ આઉટ થઈ ગયો.
કેશવ મહારાજે મિડલ ઓવરોમાં રન રેટ પર કાબૂ રાખ્યો પરંતુ તિલકે છેલ્લી છ ઓવરમાં 22 બોલમાં 52 રન ફટકારીને ભારતને મોટો સ્કોર અપાવ્યો. કેપ્ટન સૂર્યકુમાર યાદવ (1), હાર્દિક પંડ્યા (18) અને રિંકુ સિંહ (8) નિષ્ફળ રહ્યા. ભારતીય ટીમ હવે અહીંથી સિરીઝ હારી શકે નહીં. તે ચોથી અને છેલ્લી T20 જીતીને સિરીઝનો ધમાકેદાર અંત કરવા માંગે માંગશે.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે નીચે આપેલી લીંક પર ક્લિક કરીને જોડાઓ અસ્મિતા ન્યુઝ સાથે.
તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
