ચોરીમાં કોઈક વિશ્વાસુની સંડોવણીની પોલીસને આશંકાઃ સીસીટીવી ફૂટેજના આધારે તપાસ
સુરતના કાપોદ્રા ચાર રસ્તા ગજ્જર કમ્પાઉન્ડમાં આવેલા હીરાના કારખાનામાંથી ગતરાત્રે માત્ર 9 મિનિટમાં રૃ.15 લાખના રફ હીરાની ચોરી ઘટના બની હતી. માસ્ક પહેરી આવેલો એક અજાણ્યો મેઈન ગેટનું તાળું ચાવી વડે ખોલી બાદમાં બીજા ત્રણ તાળા ચાવીથી ખોલી પહેલા માળે લેસર ડિપાર્ટમેન્ટમાં મુકેલા લોકર સુધી પહોંચ્યો હતો. ચોરી બાદ તમામ તાળા ફરી મારી દઇને ચોર ફરાર થઇ ગયો હતો.
પોલીસ સૂત્રો દ્વારા પ્રાપ્ત થતી વિગતો મુજબ મૂળ બોટાદના ગઢડાના કોપાળાના વતની અને સુરતમાં વરાછા મેઈન રોડ બરોડા પ્રિસ્ટેજ પાસે ગુરુનગર ઘર નં.60 માં રહેતા 61 વર્ષીય મોહનભાઇ જયરાજભાઈ ગાબાણી કાપોદ્રા ચાર રસ્તા ગજ્જર કમ્પાઉન્ડ સરદાર કોમ્પલેક્ષની ગલીમાં પહેલા માળે ભરત ટ્રેડીંગ કોર્પોરેશનના નામે હીરાનું કારખાનું ધરાવે છે. કારખાનામાં રશિયન રફ હીરાને તૈયાર કરવામાં આવે છે. દરમિયાન, ગતરોજ રવિવારની રજા હોવાથી ગત સવારે લેસર ડિપાર્ટમેન્ટના બે ઓપરેટર નાઈટ શિફ્ટમાં કામ કરતા ભરતભાઈ ઉકાણી અને ડે શિફ્ટમાં કામ કરતા ભુપેન્દ્રભાઈ રાજપૂત પૈકી ભરતભાઈએ પ્રોસેસના હીરા કર્મચારીઓ પાસેથી મેળવી લોકરમાં મૂકી બંધ કરી ચાવી લેસર ડિપાર્ટમેન્ટના મેનેજર અશ્વિનભાઈને આપી હતી. દરમિયાન, રાત્રે 8.22 કલાકે એક અજાણ્યો માસ્ક પહેરી અને કોલેજ બેગ સાથે કારખાને આવ્યો હતો અને મેઈન ગેટનું તાળું ચાવી વડે ખીલી બાદમાં બીજા ત્રણ તાળા ચાવીથી ખોલી પહેલા માળે ઓફિસમાં મુકેલા લોકર સુધી પહોંચ્યો હતો. લોકર પણ તેણે ચાવીથી ખોલી અંદર મુકેલા અંદાજીત રૃ.15 લાખના હીરાની ચોરી કરી હતી અને હીરા કોલેજ બેગમાં મૂકી જતા જતા પાંચેય તાળા મારી ફરાર થઈ ગયો હતો.
આજે સવારે જયારે કારખાનાના મુખ્ય મેનેજર મુકેશભાઈ નાકરાણીએ લેસર ડિપાર્ટમેન્ટના સીસીટીવી કેમેરાના વાયર કપાયેલા જોતા કારખાને આવેલા મોહનભાઇને જાણ કરી હતી. લોકર સહીસલામત હોય મેનેજર અશ્વિનભાઈને બોલાવી ચેક કરતા તેમાં મુકેલા પ્રોસેસના 498.04 કેરેટમાંથી અંદાજીત રૃ.15 લાખની મત્તાના 378.32 કેરેટ હીરાની ચોરી થયાની જાણ થઈ હતી. આ અંગે મોહનભાઇએ કાપોદ્રા પોલીસને જાણ કરી હતી. હીરા ચોરી અંગે જાણ થતા દોડી ગયેલી કાપોદ્રા પોલીસે ગુનો નોંધી ગ્રાઉન્ડ ફ્લોરના સીસીટીવી ફૂટેજ મેળવી તપાસ શરૃ કરી હતી. ચોરી કરનારે મેઈન ગેટથી માંડી તિજોરી સુધી તમામ સ્થળે ચાવીથી તાળા ખોલ્યા હોય પોલીસને આશંકા છે કે ચોરીમાં લેસર ડિપાર્ટમેન્ટનો જ કોઈક વિશ્વાસુ સામેલ છે. પોલીસે હાલ કારખાનામાં કામ કરતા કર્મચારીઓની પુછપરછ શરૃ કરી છે.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે નીચે આપેલી લીંક પર ક્લિક કરીને જોડાઓ અસ્મિતા ન્યુઝ સાથે.
તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
