સામાન્ય નાગરિકો કોરોના માં બરબાદ થઈ ગયા છે અને રોજગાર છીનવાઇ ગયા છે ધંધા ભાંગી પડ્યા છે અને યુવાનો માં બેરોજગારી નો સળગતો સવાલ છે ત્યારે પડ્યા ઉપર પાટુ મારવા સરકાર નાગરિકો ને પેટ્રોલ-ડીઝલ માં ભાવ વધારી કોરોના ના નામે માસ્ક અને નિયમો ના નામે લાખ્ખો રૂપિયા વસૂલી રહી છે ત્યારે ભાજપના નેતાઓ ખુલ્લેઆમ કોરોના ગાઈડલાઈનનો ભંગ કરી ગરબે ઘૂમતા હોવાના દ્રશ્યો લોકો ને દુઃખી કરી રહ્યા છે.
સામાન્ય નાગરિકો માટે સરકાર દ્વારા બહાર પડાયેલી અનલોક-3ની ગાઈડલાઈન મુજબ રેલી અને મેળાવડા યોજવાએ મનાઈ હોવા છતાં ભાજપના પ્રમુખ હાલમાં સૌરાષ્ટ્રમાં મેળાવડા યોજી રહ્યાં છે અને ગરબા ઘૂમી રહ્યાં છે. સરકારના નિયમો માત્ર પ્રજા માટે જ હોય તેવું લાગી રહ્યું છે લોકો બેકારી માં પીડાઈ રહ્યા છે અને ટેંશન માં છે અને કરોડપતિ નેતાઓ બિન્દાસ ગરબા રમે છે ત્યારે લોકશાહી ની ખુલ્લેઆમ હાંસી થઈ રહી છે. પોલીસ ની હાજરી વચ્ચે ભાજપ પ્રમુખને કોઈ નિયમો નડતા નહિ હોવાનું પુરવાર થઇ રહ્યું છે.નેતાઓને કોરોનાનો કોઈ ડર પણ નથી અને તેમને કોઈ દંડ ફટકારવાવાળુ પણ નથી. ભાજપના નેતાઓ મનફાવે તેમ નિયમોનો ભંગ કરી રહ્યાં છે પણ તેઓ ના હાથ માં રિમોટ કંટ્રોલ હોઈ પોલીસ પણ ચુપચાપ નેતાઓ ને સારું લાગે તેવું વર્તન કરી રહી છે કારણ કે નેતાઓ સામે નિયમ અનુસાર એક્શન લેવાની તેમની તાકાત નથી એતો સામાન્ય નાગરિકો ને જ રોફ બતાવી કાયદા ના ડંડા બતાવી શકે.
સૌરાષ્ટ્રનો પ્રવાસ કરી રહેલા ગુજરાત ભાજપ પ્રદેશ પ્રમુખ સી.આર. પાટીલે સોમનાથ મહાદેવના દર્શન કર્યા પહેલાં પ્રદિપસિંહ વાઘેલા સહિતના ભાજપના નેતાઓ સોશિયલ ડિસ્ટન્સિગનું ભાન ભૂલી સોમનાથમાં રસ્તા પર રાસ-ગરબે રમ્યા હતા. ડીજેના તાલે રાસ-ગરબે રમતા નેતાઓ કેમેરામાં કેદ થયા હતા. હાલ સોશિયલ મીડિયા પર આ વીડિયો પણ વાઈરલ થઈ રહ્યો છે. તેમજ ગરબા દરમિયાન ઘણા લોકો માસ્ક વિના પણ જોવા મળ્યા હતા.
સોશિયલ ડિસ્ટન્સિગના ભંગ બદલ દુકાનો, મોલ, કોમ્પ્લેક્સને દંડ ફટકારવામાં આવી રહ્યા છે, જ્યારે ભાજપના નેતાઓ જાહેરમાં બિનધાસ્ત બનીને સોશિયલ ડિસ્ટન્સના લીરે લીરા ઉડાવી રહ્યા છે. તેમજ સામાન્ય લોકોને રૂ.1000નો દંડ કરતી સરકાર નેતાઓ અને કાર્યકરોને દંડ કરશે? આ દંડ કરવામાં આવે તો એક જ દિવસમાં લાખો રૂપિયાની સરકારને આવક થઈ જાય પણ આ દંડ ફટકારે કોણ એ એક મોટો સવાલ છે. હાલમાં સોશિયલ મીડિયામાં જે વીડિયો અને તસવીરો વાયરલ થઈ રહી છે એ જોતાં તો ભાજપના નેતાઓને એક પણ કાયદો ન નડતો હોય તેવું સાબિત થઈ રહ્યું છે.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે નીચે આપેલી લીંક પર ક્લિક કરીને જોડાઓ અસ્મિતા ન્યુઝ સાથે.
તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
