મેં કોરોના મુદ્દે બહુ સારૂં કામ કર્યું છે એમ મને વડાપ્રધાન મોદીએ કહ્યું’ : ટ્રમ્પે પોતાને જ સર્ટિફિકેટ આપી દીધું

સભા કરીને ટ્રમ્પે કોરોના ફેલાવ્યો’, તેના જ પક્ષના ગવર્નરનો વિરોધ

અમેરિકાના નેવાડા રાજ્યમાં ટ્રમ્પની ચૂંટણી સભા અંગે વિરોધ થયો હતો. ટ્રમ્પના જ ડેમોક્રેટિક પક્ષના ગવર્નરે જાહેરમાં મોટી સભા સામે વાંધો ઉઠાવ્યો હતો. પરિણામે ટ્રમ્પે પોતાની રેલી ઈન્ડોર ગોદામમાં કરવી પડી હતી. ટ્રમ્પના ચૂંટણી પ્રચારમાં આ પહેલી રેલી હતી જે ઈન્ડોર કરવી પડી હોય. એટલું જ નહીં ગવર્નરે કહ્યું હતું કે આ રેલીને કારણે અસંખ્ય લોકોમાં કોરોના ફેલાયો હશે અને અત્યારે તેની ખબર પણ નહીં પડે.

ટ્રમ્પની આ રેલીમાં મોટા ભાગના લોકોએ માસ્ક પહેર્યા ન હતા કે સોશિયલ ડિસ્ટન્સિંગનું પાલન પણ કર્યું ન હતું. બીજી તરફ વોશિંગ્ટનમાં એક સભામાં ટ્રમ્પે કહ્યું હતું કે કોરાના મુદ્દે ઉત્તમ કામગીરી બદલ વડા પ્રધાન મોદીએ મારા વખાણ કર્યા છે. ટ્રમ્પે કહ્યું હતું કે અત્યાર સુધી આપણે ભારત કરતાં પણ વધુ ટેસ્ટ કર્યા છે. માટે મોદીએ કહ્યું હતું કે તમે ટેસ્ટિંગની જે કામગીરી કરી એ પ્રસંશાપાત્ર છે.

ટ્રમ્પ ડેમોક્રેટિક પક્ષમાંથી આવે છે, જ્યારે નેવાડાના ગવર્નર સ્ટીવ સિસોલ્ક પણ ડેમોક્રેટિક પક્ષમાંથી છે. પરંતુ ટ્રમ્પનો વિરોધ કરતા તેઓ અચકાયા ન હતા. સિસોલ્કે કહ્યું હતું કે ટ્રમ્પે જે કર્યું એ સ્વાર્થી અને મુર્ખામીભર્યું પગલું છે. સિસોલ્કે કહ્યું કે ટ્રમ્પ કોરોના સામે પહોંચી વળી શક્યા નથી એટલા માટે રાજ્યોના ગવર્નરો પર જવાબદારી ઢોળી દીધી હતી.

અમેરિકામાં નવેમ્બરમાં ચૂંટણી છે અને એ માટેે ટ્રમ્પ તથા તેમના હરિફ બિડેન ઠેર ઠેર સભા સંબોધી રહ્યા છે. ટ્રમ્પે કહ્યું હતું કે બિડેન સત્તામાં આવશે તો દેશની સ્થિતિ કથળશે. પણ સામે મેં ચાર વર્ષમાં નવી નોકરીઓ સર્જી છે અને ચીન જેવા દેશોને હંફાવી રહ્યો છું. એ રીતે ટ્રમ્પે પોતાનો પક્ષ મજબૂત કરવા પ્રયાસ કર્યો હતો.

ટ્રમ્પની મીડલ-ઈસ્ટ સંધિ કેટલી સફળ?

ટ્રમ્પની મધ્યસ્થીથી ઈઝરાયેલ અને મધ્ય-એશિયાના કેટલાક આરબ દેશો વચ્ચે સંધિ થવાની શરૂઆત થઈ રહી છે. મધ્ય એશિયાના આરબ દેશો અને તેની વચ્ચે આવેલો નાનકડો દેશ ઈઝરાયેલ એકબીજા સાથે દાયકાઓથી દુશ્મની ધરાવે છેે.

ટ્રમ્પના પ્રયાસથી હવે ઈઝરાયેલની જોર્ડન તથા ઈજિપ્ત સાથે સંધિ થવા જઈ રહી છે. યુનાઈટેડ આરબ અમિરાતે પહેલેથી જ ઈઝરાયેલ સાથેે રાજદ્વારી સબંધો સ્થાપી દીધા છે. બહેરિન સાથે પણ સંધિ થવા જઈ રહી છે.

કેટલાક નિષ્ણાતોના મતે આ સંધિ ખાસ અસરકારક સાબિત નહીં થાય. કેમ કે પહેલેથી જ જ્યાં સારા સબંધો છે, ત્યાં સંધિ શું કરવાની?  અલબત્ત, બીજી તરફ એવુ માનનારો વર્ગ પણ છે કે અત્યારે જે સંધિ થઈ રહી છે, તેનાથી મધ્ય પૂર્વનો લોહિયાળ સંઘર્ષ ઓછો થશે. આજે નાની એવી શરૂઆત થઈ છે, તેનું મહત્ત્વ છે. આ સંધિના પ્રયાસો માટે ટ્રમ્પને નોબેલ પ્રાઈઝ મળે એ માટે નોમિનેટ પણ કરવામાં આવ્યા છે.