નેપાળની શાસક સામ્યવાદી પાર્ટીમાં ઉથલપાથલ ચરમસીમાએ છે. વડા પ્રધાન કેપી શર્મા ઓલીના રાજકીય ભાવિનો નિર્ણય પક્ષની સ્ટેન્ડિંગ કમિટિની બેઠકમાં લેવામાં આવશે.

પક્ષ વિરોધી છાવણીના વલણને જોતાં એવું માનવામાં આવે છે કે ઓલી પાસેથી પાર્ટી અધ્યક્ષ અથવા વડા પ્રધાનપદેથી રાજીનામું લઇ લેવામાં આવશે. સંભવ છે કે ચીનની નજીક મનાતા ઓલીની બંને હોદ્દા પર વિદાય થાય.

આજથી ફરી શરૂ થયેલી સ્ટેન્ડિંગ કમિટિની બેઠકમાં શું થશે તેનું ટ્રેલર બુધવારે જ જોવામાં આવી ચુક્યું છે. પાર્ટીના બંને અધ્યક્ષો કેપી ઓલી અને પુષ્પ કમલ દહલે એકબીજા પર નિશાન સાધ્યું હતું.

સ્ટેન્ડિંગ કમિટીમાં ઓલી લઘુમતીમાં છે, પરંતુ તેના પર આરોપો વધારે છે. કાઠમંડુ પોસ્ટના એક અહેવાલ મુજબ, સ્ટેન્ડિંગ કમિટિમાં વિરોધી છાવણીના બે સભ્યોના જણાવ્યા મુજબ ઓલીને વડા પ્રધાનપદ છોડવાનું કહેવામાં આવશે.

એક સભ્યએ કહ્યું, “દહલે બુધવારે જે રીતે વાત કરી તેનાથી એ સ્પષ્ટ સંદેશ જાય છે કે ઓલીની સ્થિતિ બરાબર નથી.” પ્રચંડએ ઓલીને સ્પષ્ટ અને કઠોર સંદેશ આપ્યો હતો.

“તેમણે એમ પણ કહ્યું કે દહલે પણ શક્યતાઓનો ઉલ્લેખ કર્યો હતો અને ઓલીને ચેતવ્યા હતા, જે તેઓ સત્તામાં રહેવા માટે કરી શકે છે.”

પ્રચંડએ કહ્યું, “અમે સાંભળ્યું છે કે, સત્તામાં રહેવા માટે પાકિસ્તાન, અફઘાનિસ્તાન અથવા બાંગ્લાદેશ મોડેલ પર કામ ચાલી રહ્યું છે.” પરંતુ આવા પ્રયત્નો સફળ થશે નહીં.

ભ્રષ્ટાચારના નામે કોઈ અમને જેલમાં નહીં નાખી શકે. સૈન્યની મદદથી દેશ ચલાવવો એટલો સરળ નથી, અને પાર્ટીને તોડીને વિપક્ષની સાથે સરકાર ચલાવવી પણ શક્ય નથી.

એવું કહેવામાં આવી રહ્યું છે કે કેપી ઓલી પાર્ટીમાં સંપૂર્ણ રીતે અલગ-થલક પડી ગયા છે. સંભવ છે કે તેઓને એમ કહેવામાં આવે કે તેઓએ પાર્ટી અધ્યક્ષ અથવા વડા પ્રધાનમાંથી કોઇ  એક પદ છોડી દેવું પડશે.

સૂત્રોના જણાવ્યા અનુસાર, જો કોઈ વિકલ્પ આપવામાં આવે તો ઓલી પાર્ટી અધ્યક્ષ પદ છોડવાનું પસંદ કરશે. આ સિવાય તે બીજા વિકલ્પ હેઠળ મંત્રીમંડળમાં ફેરફારની દરખાસ્ત કરી શકે છે જેમાં પ્રચંડની છાવણીના નેતાઓને વધુ હોદ્દા આપવામાં આવે. પરંતુ વિરોધી છાવણી તેમાં રસ દાખવી રહી નથી.

તેમની સામેનું વાતાવરણ જોતાં વડા પ્રધાન ઓલીએ પ્રચંડને ગુરૂવારે તેમના નિવાસ સ્થાને બોલાવ્યા અને શરમથી બચવા માટે તેમણે સમજુતી પર પહોંચવાનો પ્રયાસ કર્યો. જો કે, દહલે સ્પષ્ટ કર્યું છે કે તેઓ અથવા તેમના લોકોના જૂથ તેમનું વલણ બદલશે નહીં.