સુરત: સુરત ફરી થયું શર્મસાર…માત્ર બે વર્ષની માસૂમ બાળકીની લાશ મળતા ચકચાર, દુષ્કર્મ થયાની આશંકા, વિધર્મી યુવક ઝડપાયો

સુરત એકવાર ફરી શર્મસાર થયું છે. શહેરથી ફરી એક ચકચારી ઘટના સામે આવી છે. શહેરના સચિન ગામ પાસે આવેલા કપલેથા ગામમાં રહેતી બે વર્ષની માસૂમ બાળકી સાથે 23 વર્ષીય વિધર્મી યુવકે દુષ્કર્મ કર્યા બાદ હત્યા કરી હોવાની ઘટના બની છે. મોડી રાતે બાળકીની લાશ મળી આવી હતી. આથી સચિન પોલીસ પણ દોડતી થઈ હતી અને તપાસનો ઘમઘમાટ શરૂ કર્યો હતો. આ કેસમાં પોલીસે એક નરાધમ યુવકની ધરપકડ કરી છે. જણાવી દઈએ કે, અગાઉ 25મી ફેબ્રુઆરીએ સુરત સેશન્સ કોર્ટે બાળકી પર દુષ્કર્મ આચરી હત્યા કરવાના ગુનામાં એક નરાધમને ફાંસીની સજા ફટકારી છે.

પાડોશમાં રહેતો યુવક રમાડવા માટે સાથ લઈ ગયો

માહિતી મુજબ, સુરતના સચિન વિસ્તારમાં આવેલા કપલેથા ગામમાં રહેતી બે વર્ષની બાળકીને પાડોશમાં રહેતો 23 વર્ષીય ઈસ્માઈલ યુસુફ સોમવારે પોતાની સાથે રમવા માટે ઘરેથી લઈ ગયો હતો. જો કે, મોડી રાત સુધી બાળકી ઘરે પરત આવી નહોતી. આથી પરિવારજનોએ બાળકીની શોધખોળ આદરી હતી. દરમિયાન જાણવા મળ્યું કે પાડોશમાં રહેતો ઇસ્માઇલ બાળકીને રમાડવા માટે લઈ ગયો હતો. ઇસ્માલની શોધ કરી તો એક પણ ગાયબ હતો. આથી પરિજનોએ સચિન પોલીસ સ્ટેશનમાં આ અંગે ફરિયાદ કરી હતી. પોલીસે પણ વાતની ગંભીરતાને સમજી ત્વરિત કાર્યવાહી હાથ ધરી હતી. બાળકીની શોધ દરમિયાન પોલીસને કપલેથા ગામ નજીક આવેલા એક બંધ મકાનની પાછળ ખુલ્લી જગ્યામાં ઝાડીઓમાંથી બાળકીની લાશ મળી આવી હતી.

પોલીસને દુષ્કર્મ થયાની આશંકા

બાળકીની લાશ મળ્યા બાદ પોલીસને તેણી સાથે દુષ્કર્મ થયું હોવાની શંકા છે. આથી પોલીસે બાળકીના મૃતદેહને પોસ્ટ મોર્ટમ માટે મોકલી આપ્યો છે. જ્યારે નરાધમ યુવકને પકડવા માટે અલગ-અલગ ટીમ બનાવી સર્ચ ઓપરેશન હાથ ધર્યું હતું. જો કે, પોલીસે ગણતરીના કલાકોમાં જ યુવકને ઝડપી પાડ્યો છે. ત્યારે હાલ યુવકે બાળકી સાથે દુષ્કર્મ કર્યું છે કે નહીં અને હત્યા કરી છે કે નહીં એ અંગે પૂછપરછ કરી રહી છે. હાલ, પીએમ રિપોર્ટ આવ્યો નથી. પરંતુ, પોલીસને બાળક સાથે દુષ્કર્મ કર્યા બાદ તેની હત્યા કરી હોવાની શંકા છે. આ ચકચારી ઘટના બાદ સમગ્ર વિસ્તારમાં લોકોમાં રોષની લાગણી જોવા મળી રહી છે.