વિશ્વભરમાં કોરોનાના વધતા જતા કેસોને ધ્યાનમાં રાખીને એક મોટો નિર્ણય લેતા કેન્દ્રની નરેન્દ્ર મોદી સરકારે આંતરરાષ્ટ્રીય ફ્લાઇટમાંથી આવતા મુસાફરોના રેન્ડમ કોરોના ટેસ્ટિંગની જાહેરાત કરી છે. ગુરુવારે સરકાર દ્વારા જારી કરવામાં આવેલા નિવેદનમાં કહેવામાં આવ્યું છે કે આ પ્રક્રિયા 24 ડિસેમ્બરથી શરૂ થશે. શરૂઆતમાં માત્ર 2 ટકા મુસાફરોનું પરીક્ષણ કરવામાં આવશે અને જેમાં અલગ-અલગ દેશોના મુસાફરોનું ટેસ્ટિંગ કરવામાં આવશે.
ચીન સહિત વિશ્વના ઘણા દેશોમાં કોવિડના ઝડપથી વધી રહેલા કેસોને ધ્યાનમાં રાખીને કેન્દ્રીય સ્વાસ્થ્ય મંત્રાલયે નાગરિક ઉડ્ડયન મંત્રાલયને પત્ર લખ્યો છે. આ પત્રમાં લખવામાં આવ્યું છે કે દરેક ફ્લાઇટમાં આવનારા મુસાફરોમાંથી 2 ટકા મુસાફરોનું એરપોર્ટ પર રેન્ડમ ટેસ્ટિંગ કરવામાં આવશે. કયા મુસાફરોનું પરીક્ષણ કરવામાં આવશે અને તે સંબંધિત એરલાઇન્સ દ્વારા નક્કી કરવામાં આવશે.
ગુરુવારે વડા પ્રધાન નરેન્દ્ર મોદીએ ઘણા દેશોમાં વધી રહેલા કોરોના કેસોને ધ્યાનમાં રાખીને એક ઉચ્ચ સ્તરીય બેઠક યોજી હતી અને આ બેઠકમાં દેશમાં કોરોનાની નવીનતમ સ્થિતિની સમીક્ષા કરવામાં આવી હતી. કેન્દ્રીય ગૃહ પ્રધાન અમિત શાહ, કેન્દ્રીય આરોગ્ય અને પરિવાર કલ્યાણ પ્રધાન મનસુખ માંડવિયા અને નાગરિક ઉડ્ડયન પ્રધાન જ્યોતિરાદિત્ય સિંધિયા સહિત ઘણા મોટા નેતાઓ વીડિયો કોન્ફરન્સ દ્વારા આ બેઠકમાં સામેલ થયા હતા.
ચીન, જાપાન, દક્ષિણ કોરિયા, ફ્રાન્સ અને અમેરિકામાં કોરોનાના કેસ ઝડપથી વધી રહ્યા છે. આથી કેન્દ્ર સરકાર સક્રિય બની છે. આ મામલે કેન્દ્રીય સ્વાસ્થ્ય અને પરિવાર કલ્યાણ મંત્રી મનસુખ માંડવિયાએ પણ સંસદમાં નિવેદન આપ્યું હતું અને કહ્યું હતું કે દેશમાં સ્થિતિ નિયંત્રણમાં છે. માંડવિયાએ કહ્યું કે કોરોના હજુ ખતમ થયો નથી. તેમણે કહ્યું કે કોરોનાના પ્રકારો બદલાઈ રહ્યા છે અને આવી સ્થિતિમાં દરેક વ્યક્તિએ રસી લેવી જોઈએ અને સલામતીના નિયમોનું પણ પાલન કરવું જોઈએ.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે નીચે આપેલી લીંક પર ક્લિક કરીને જોડાઓ અસ્મિતા ન્યુઝ સાથે.
તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
